ശക്തമായ കാറ്റിലും കനത്ത മഴയിലും രണ്ട് വീടുകള്‍ തകര്‍ന്നു

പാവറട്ടി: ശക്തമായ കാറ്റിലും കനത്ത മഴയിലും വെന്മേനാടും എളവള്ളിയിലും രണ്ട് വീടുകള്‍ തകര്‍ന്നു. എളവള്ളി പാറയ്ക്ക് സമീപം കോവത്ത് ഗോപാലകൃഷ്ണന്റെ ഓടിട്ട വീടാണ് സമീപത്തെ തെങ്ങ് കടപുഴകി വീണ് തകര്‍ന്നത്. വീടിനകത്തുണ്ടായിരുന്ന ഗോപാലകൃഷ്ണന്റെ മകള്‍ പൂജയ്ക്ക് മേല്‍ക്കൂരയിലെ ഓട് വീണ് തലയ്ക്ക് പരിക്കേറ്റു.

വെന്മേനാട് കൈതമുക്കില്‍ മൂക്കോല ചന്ദ്രബോസിന്റെ ഓടിട്ട വീടും തകര്‍ന്നിട്ടുണ്ട്. തിങ്കളാഴ്ച വൈകീട്ട് മഴയില്‍ ചുമര്‍ കുതിര്‍ന്ന് ഇടിഞ്ഞുവീഴുകയായിരുന്നു. പഞ്ചായത്ത് അധികൃതരും വില്ലേജ് ഓഫീസ് ഉദ്യോഗസ്ഥരും തകര്‍ന്ന വീടുകള്‍ സന്ദര്‍ശിച്ചു.