സി.പി.എം. നേതാവിന്‌ വെട്ടേറ്റു; മുല്ലശേരി പഞ്ചായത്തില്‍ ഇന്നു ഹര്‍ത്താല്‍

ആരിഫ് വൈശ്യം വീട്ടില്‍ 

പാവറട്ടി: മുല്ലശേരിയില്‍ സി.പി.എം. നേതാവിനെ വധിക്കാന്‍ ശ്രമം. മുല്ലശേരി മുന്‍ ഗ്രാമപഞ്ചായത്ത്‌ പ്രസിഡന്റും സി.പി.എം. ലോക്കല്‍ സെക്രട്ടറിയുമായ മുല്ലശേരി ചിരിയങ്കണ്ടത്ത്‌ ബാബുവി (47) നെയാണ്‌ വധിക്കാന്‍ ശ്രമിച്ചത്‌. ശരീരമാസകലം പരുക്കേറ്റ ബാബുവിനെ പാവറട്ടി സാന്‍ജോസ്‌. ആശുപത്രിയിലും തുടര്‍ന്ന്‌ അമല ആശുപത്രിയിലും പ്രവേശിപ്പിച്ചു. ഇന്നലെ (തിങ്കളാഴ്ച്ച)  രാത്രി 8.45നാണ്‌ സംഭവം.

മണല്‍ മാഫിയാ സംഘം വീടു കയറി ആക്രമിച്ചു; സ്ത്രീയടക്കം മൂന്നു പേര്‍ക്ക് പരിക്ക്

കെ എം അക്ബര്‍  

പുന്നയൂര്‍ക്കുളം: മണല്‍ മാഫിയാ സംഘത്തിന്റെ വീടു കയറിയുള്ള ആക്രമണത്തില്‍ സ്ത്രീയടക്കം മൂന്ന് പേര്‍ക്ക് പരിക്ക്. വീട്ടില്‍ അതിക്രമിച്ചു കയറിയ സംഘം ഗൃഹോപകരണങ്ങള്‍ അടിച്ചു തകര്‍ത്തു. അകലാട് മൂന്നൈനി ബീച്ച് തട്ടാന്‍കര വീട്ടില്‍ ജബാര്‍(32), സഹേദരങ്ങളായ ഫാത്തിമ (41), ഷഫീഖ് (18) എന്നിവര്‍ക്കാണ് പരിക്കേത്. ഇന്നലെ രാവിലെ ഏഴോടെയാണ് സംഭവം. മാരകായുധങ്ങളുമായെത്തിയ സംഘം വീട്ടുകാരെ ആക്രമിക്കുകയും ഗൃഹോപകരണങ്ങള്‍ അടിച്ചു തകര്‍ക്കുകയുമായിരുന്നു. വീടിന്റെ ജനല്‍ ചില്ലുകളും അടിച്ചു തകര്‍ത്തിട്ടുണ്ട്. കഴിഞ്ഞ ദിവസം രാത്രി മൂന്നൈനി കടപ്പുറത്തു നിന്നും മണല്‍ കടത്തുകയായിരുന്ന സംഘം ജബാറുമായി വക്കുതര്‍ക്കം ഉണ്ടായിരുന്നു. പരിക്കേറ്റവരെ ചാവക്കാട് താലൂക്ക് ആശുപത്രിയില്‍ പ്രവശിപ്പിച്ചു. വടക്കേകാട് പോലിസ് കേസെടുത്തു. 

മുല്ലശേരി ഉപജില്ല സ്കൂള്‍ കലോത്സവം

വെങ്കിടങ്ങ്: മുല്ലശേരി ഉപജില്ല സ്കൂള്‍ കലോത്സവം മുല്ലശേരി ഗവ. ഹയര്‍ സെക്കന്‍ഡറി സ്കൂളില്‍ മുരളി പെരുനെല്ലി എംഎല്‍എ ഉദ്ഘാടനം ചെയ്തു. ഉദ്ഘാടന ചടങ്ങില്‍ മുല്ലശേരി പഞ്ചായത്ത് പ്രസിഡന്റ് ഗീത ഭരതന്‍ അധ്യക്ഷത വഹിച്ചു.
കലാമണ്ഡലം ഗീതാ നന്ദന്‍ കലോത്സവ സന്ദേശം നല്‍കി. കലോത്സവങ്ങള്‍ കലാകാരന്‍മാരെ സൃഷ്ടിക്കാന്‍ കഴിവുള്ളതാക്കണമെന്ന് മോഹന്‍ സിത്താരയും കലാമണ്ഡലം ഗീതാ നന്ദനും പറഞ്ഞു.