മുഹമ്മദ് സഗീര്‍ പണ്ടാരത്തില്‍
ദോഹ: ഫെബ്രുവരി 18, 19 തീയതികളില്‍ ദോഹയിലെ മാരിയറ്റ് ഹോട്ടലില്‍ നടക്കുന്ന ഓവര്‍സീസ് ഇന്ത്യന്‍ കള്‍ച്ചറല്‍ കോണ്‍ഗ്രസിന്റെ (ഒ.ഐ.സി.സി) ഗ്ലോബല്‍ മീറ്റ്‌ കേന്ദ്ര ന്യൂനപക്ഷ വകുപ്പുമന്ത്രി സല്‍മാന്‍ ഖുര്‍ഷിദാണ് സമ്മേളനം ഉദ്ഘാടനംചെയ്യും.
വിദേശരാജ്യങ്ങളില്‍ പ്രവര്‍ത്തിക്കുന്ന കോണ്‍ഗ്രസ് അനുകൂലസംഘടനകളെ ഒരേ കൊടിക്കീഴില്‍ അണിനിരത്തുകയെന്ന ലക്ഷ്യമാണ്‌ ഓവര്‍സീസ് ഇന്ത്യന്‍ കള്‍ച്ചറല്‍ കോണ്‍ഗ്രസ്സിന്റെ രണ്ടാമത് ആഗോളസമ്മേളനത്തിന്റെ മുഖ്യലക്ഷ്യം.സമ്മേളനത്തില്‍ ഒ.ഐ.സി.സി.യുടെ അന്താരാഷ്ട്ര കമ്മിറ്റിക്ക് രൂപം നല്‍കുമെന്ന് അറിയുന്നു.കെ.പി.സി.സി. പ്രസിഡന്റ് രമേശ് ചെന്നിത്തല അധ്യക്ഷതവഹിക്കും. എ.ഐ.സി.സി. ജനറല്‍സെക്രട്ടറി ഓസ്‌കാര്‍ ഫെര്‍ണാണ്ടസ് മുഖ്യാതിഥിയായിരിക്കും. പ്രതിപക്ഷനേതാവ് ഉമ്മന്‍ചാണ്ടി, കേന്ദ്ര ഊര്‍ജവകുപ്പു സഹമന്ത്രി കെ.സി. വേണുഗോപാല്‍ , ജി.കാര്‍ത്തികേയന്‍, സ്വാഗതസംഘം മുഖ്യരക്ഷാധികാരി സി.കെ. മേനോന്‍ തുടങ്ങിയവര്‍ സംസാരിക്കും.തുടര്‍ന്നുനടക്കുന്ന വിവിധ സമ്മേളനങ്ങളില്‍ കേന്ദ്ര വിദേശകാര്യസഹമന്ത്രി പ്രനീദ്കൗര്‍ , എം.പി.മാരായ പി.ജെ. കുര്യന്‍, പി.ടി. തോമസ്, ആന്റോ ആന്റണി, എം.കെ. രാഘവന്‍, കെ.പി. ധനപാലന്‍, മുന്‍ എം.പി. എ.ചാള്‍സ് തുടങ്ങിയവര്‍ പങ്കെടുക്കും.
18ന് വൈകുന്നേരം 5 മണിക്ക് ശൈഖ് ഫൈസല്‍ ബിന്‍ കാസിം അല്‍ത്താനിയുടെ ശമാലിലുള്ള ഫാമില്‍ വെച്ച് 'ഓവര്‍സീസ് ഇന്ത്യന്‍ കള്‍ച്ചറല്‍ കോണ്‍ഗ്രസ്സിന്റെ ലക്ഷ്യവും വിദേശഇന്ത്യക്കാര്‍ നേരിടുന്ന വെല്ലുവിളികളും' എന്ന വിഷയത്തെക്കുറിച്ചുള്ള ചര്‍ച്ചനടക്കും.ഒ.ഐ.സി.സി.യുടെ പ്രത്യേക ചുമതലയുള്ള കെ.പി.സി.സി. ജനറല്‍സെക്രട്ടറി കെ.സി.രാജന്‍, സെക്രട്ടറി മാന്നാര്‍ അബ്ദുള്‍ലത്തീഫ് എന്നിവര്‍ സംസാരിക്കും. അത്താഴവിരുന്നും കലാപരിപാടികളും ഉണ്ടാവും.
19ന് കാലത്ത് മാരിയറ്റ് ഹോട്ടലില്‍ 'വിദേശ ഇന്ത്യക്കാരും വികസനപ്രക്രിയകളും', 'ജനാധിപത്യ പ്രക്രിയയില്‍ വിദേശഇന്ത്യക്കാരുടെ പങ്ക്' തുടങ്ങിയ വിഷയങ്ങളെക്കുറിച്ച് ചര്‍ച്ചകള്‍ നടക്കും. മുന്‍ പ്രവാസികാര്യവകുപ്പുമന്ത്രി എം.എം.ഹസ്സന്‍, വിജയരാഘവന്‍, കൊടിക്കുന്നില്‍ സുരേഷ് എം.പി, പ്രൊഫ. ബാലചന്ദ്രന്‍, ഐസക് പട്ടാണിപ്പറമ്പില്‍ എന്നിവര്‍ സംസാരിക്കും.
വൈകുന്നേരം നാലുമണിക്ക് നടക്കുന്ന സമാപന സമ്മേളനം വ്യോമയാന പ്രവാസികാര്യവകുപ്പുമന്ത്രി വയലാര്‍ രവി ഉദ്ഘാടനംചെയ്യും. രമേശ് ചെന്നിത്തല, പ്രതിപക്ഷനേതാവ് ഉമ്മന്‍ചാണ്ടി, ഓസ്‌കാര്‍ ഫെര്‍ണാണ്ടസ് എന്നിവര്‍ പ്രസംഗിക്കും. പ്രവാസി ഭാരതീയ സമ്മാന്‍ ജേതാക്കളായ ഗള്‍ഫാര്‍ മുഹമ്മദലി, എം.എ. യൂസുഫ് അലി, ബി.അര്‍ . ഷെട്ടി, ഡോ. രവിപിള്ള, ഡോ.ആസാദ് മൂപ്പന്‍, സോമന്‍ ബേബി തുടങ്ങിയവരെ ആദരിക്കും.
സമ്മേളനത്തിനുള്ള എല്ലാ ഒരുക്കങ്ങളും പൂര്‍ത്തിയായതായും 250 ല്‍ പരം പ്രതിനിധികള്‍ പേര്‍ രജിസ്റ്റര്‍ ചെയ്തുവെന്നും 500 ഓളം പ്രതിനിധികള്‍ സംഗമത്തില്‍ പങ്കെടുക്കുമെന്നും ഭാരവാഹികള്‍ അറിയിച്ചു. ഐ.സി.സിയില്‍ നടന്ന പത്രസമ്മേളനത്തില്‍ സ്വാഗതസംഘം ചെയര്‍മാന്‍ കെ.കെ ഉസ്മാന്‍, ജനറല്‍ കണ്‍വീനര്‍ ജോപ്പച്ചന്‍ തെക്കേക്കൂറ്റ്, ഇന്‍കാസ് ജനറല്‍ സെക്രട്ടറി മുഹമ്മദലി പൊന്നാനി, സ്വീകരണ കമ്മിറ്റി കണ്‍വീനര്‍ മന്‍സൂര്‍ പളളൂര്‍ തുടങ്ങിയവര്‍ പങ്കെടുത്തു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ
താങ്കളുടെ അഭിപ്രായത്തിന് നന്ദി
താങ്കളുടെ അഭിപ്രായം അനുയോജ്യമായത് ആണെങ്കില്‍ ഉടനെ പ്രസിദ്ധീകരിക്കുന്നതാണ്.